第二回：雷公應悔瞌眼目訓，遲 o 左落船震騰騰

香港同澳門的船程大概係一個鐘頭倒啦，家陣百無聊賴，雷公就開始思考到底
Simon 兄尋晚為乜同佢咁老死。就響尋日跑完馬之嘛，西門慶忽然主動行埋雷公
身邊，仲搭哂膊頭咁話：“細佬，聽日俾心機騎馬，場場都要全力以赴做到最
好，務必要為港爭光呀！”西門慶平時份人冇乜點，就好似佢個英文名話齋，
「Simon Yim」，「駛乜鹽」！淨係一個西門慶都足夠鹹死一個星球的雌性生物 o 係
啦！話哂人地都係師兄輩，真係何只搭膊頭呀？就算要自己幫西門慶 DUP 骨鍊
背脊遞茶都要頂硬上啦！鬼叫自己出世遲咩！

“點解佢要「咁樣」支持我？”原來當日西門慶響同雷公 say goodbye 之後，竟然

用佢果架靚車“GS 169”去請雷公吸幾啖新鮮廢氣，等呢位小師弟見識下何謂“
知死，一路嘔”咁話。正所謂一啖砂糖一啖米田共，雷公真係諗爆頭都未明西門
慶個葫蘆賣咩藥。學阿詩師姐響無記齣長劇度句口頭禪話齋：“你有你度馬，我
有我瞌下。”，於是雷公就不理周遭馬迷不時向自己投以訝異目光(奇怪點解自
己冇跟班 o 卦)，一於瞌返個靚覺豬至算。

瞌瞌下，隻船都已經駛埋岸囉，而阿雷公仲要係俾船員拍醒至知要落船。話說雷
公未換傻仔證之前就同父母去過澳門玩 o 既，事隔多年，家陣牛龜咁大隻，仲
鬼記得點過海關咩！死啦，周圍人影都冇隻，點行出去呢？雷公冇計，只有見
電梯就上電梯，終於俾佢行到上盡頭之際，冷不防聽倒有人大嗌：

“雷公呀！”

雷公一聽之下，打 O 左個突之餘仲搞到額頭標冷汗：

“乜唔係個個都出哂關咩？唔會係果味 o 野下嘛？”