ek duniya hai kale makhmal par chandi ke taar se buni huvi.

makhmal ki silvato
mein hawa ruk jati hai. ek bada sa gate hai. samne fountains hai. jhilmilata pani
nazar aa raha hai. tharakti huvi jawaniya aur betahaasaha chalne wale pairo mein
pade chhale na jane kon si daastan dohra rahe hai. bhukh aur sapne dono ek dusre
mein ghul mil jate hai. tooti huvi kabaro mein ghas ug raha hai. khule aasman ke
niche koi soya huva hai. hawao ki lakire paani ki satah par ojhal ho jati hai.
patto par chhayi os ki bundo ko dhup pi jati hai. aadhi khuli huvi khidkiyo ke
bahar sharmili chandni chamak rahi hai. safed nakhuno ke pichhe zindagi ab bhi
jiye jati hai. itihas me se ek dhuaa uthta hai. mehnatkash insano ke pasine mein
gulab ki khushbu aa jati hai. barish ki bunde hamari nazaro ke samne hi ojhal ho
jati hai. shabab ke rango mein bhigi koi hasina aankhe jhapka kar dekh rahi hai.
mein barso se dhundh raha hu in sab chizo ke beech tujhe....barso se....

ek future aaine mein dikhayi deta hai. ab mein khud ke aur karib aa jata hu. meri
naso me laal garm khun beh raha hai use mehsus kar raha hu. aisa lagta hai ke mere
aaspas ek pinjra to zarur hai lekin us par koi khushnuma chandni baras rahi hai.
isliye mein us pinjre se bahar nikalne ki koshish nahi karta. chidiya ke bachhe ka
pehla parvaz aur pehli udaan kaisi hoti hai ? jab woh apne pankh faila kar safed
badalo ke paar nile aasmna mein udta hai to ek pal ke liye thoda dar se kaanp jata
hai lekin phir pankh fadfadaa kar roshn aasman ki satah par udta chala jata hai.
uski aankho mein ek tajjub hai. aur chonch mein chahchahaat hai. ek gunj hai jo
dur dur tak ja rahi hai.

kabhi mein pehli barish ke baad mitti se uthne wali mehak ke bare mein sochta hu.
mere gale se subha ki parchhaiyan nikal rahi hai. aur zamin se mithi khusbhu aa
rahi hai. mein kisi pyar bachhe ko apni god mein lena chahta hu. horizons ke paar
aankho mein se kahi aansu ki ek lakir nikli hogi. is bhare shahar mein mera dil
kisi ek anjaan kone mein jaa kar baith jata hai chup chap. samandar ke kinare se
suraj ko dubta huva dekhta hu to lagta hai ki mere ander se bhi meri ruh ka ek
hissa roz uske sath thoda thoda dub raha hai. footpath par ek garib artist sunset
ke photos le kar baitha hai. racecourse ke maidan ke bahar raling ke paas thake
huve ghode haanf rahe hai. sham dhal gayi hai aur college ki khidkiya band hai.
masjid ke gubmbaz ke pichhe suraj ki lal lakir aur ek dariya chhup gaya hai. sadak
ke dono tarf sky scrappers ki ek kataar hai. sham ka ghana andhera ab magnisium ki
tarah, udas aur tanha ban kar hawao mein jhul raha hai. sukhi rotiyan todne wali
hatheli jhulas kar kali pad jati hai.

raat dhal jati hai aur hawao mein ghutan badh jati hai. hazaro aankhe samandar ke
kinare kinare jaag gayi hai. bojhal aasman pure shahar par jhuka huva hai. aawaze
kaanpne lagi hai aur sadke romantic ho gayi hai. ek pura shahar simat kar kho sa
gaya hai.

raat insan ko akela kyo bana deti hai. jab koi karib nahi hota to dil par ek wazan
sa lagta hai. is shahar ki raat alarm timepiece ke radium dial ki tarah mere
aaspas ghum rahi hai. muje yad hai bachpan mein ek bar dariya kinare meine tut'ta
huva tara dekha tha. ab usi tare ki talash mein ek tishnagi hai. suba se raat tak
samandar mein behta pani muje bula raha hai. zindagi bhar to apne aap ke sath kho
kho ka khel nahi khel sakte. koi bhul bhulaiyya mein kho jata hai to koi game jeet
jata hai. har game ke kanoon se hame baakhabar rehna padta hai.

suba ho gayi. school bus mein baith kar apne apne tiffin box khol kar bachhe ek
dusre se shararat kar rahe hai. khwabo mein koi aaya tha.. ek sadi pehle....aaj
phir jeene ki tamanna hai......