Turismo ta den bon direccion, toch tin retonan den airlift cu mester wordo supera

Entrante dia 11 di november 2011, American Airlines lo no bula mas riba e ruta New York pa Aruba. E decision aki probablemente tin di haber cu e competencia fuerte cu e aerolinea ta recibiendo di Jet Blue cu practicamene a conkista e ruta aki for di nan. Cu e decision aki awor Gobierno lo mester bay mesa cu Jet Blue pa mira con nan lo yena e bashi cu American Airlines ta bay laga atras awor. Den un comunicado di prensa emiti dor di Minister Otmar Oduber, e ta bisa di ta hopi satisfecho cu e resultadonan di turismo pa loke ta e prome 4 lunanan di aa 2011, caminda por a mira un crecemento di 5.4% den cantidad di turista y riba 6% den ADR (Average Daily Roomrate). Esaki ta supera e obhetivo di crecemento cu a wordo stipula den plan di maneho di Turismo pa 2011, cual ta 3%. E cifranan aki sigur ta sumamente positivo, pero e no ta kita afo cu mirando e situacion mundial, specialmente e aumento di prijs di petroleo y e competencia grandi entre aerolineanan, cu tin retonan grandi riba tereno di aviacion. Manera Minister Oduber a anuncia siman pasa, e competencia entre aerolinea nan regular legacy carriers cu aerolinea nan di costo abou low cost carriersta uno hopi fuerte caminda esunnan regular ta haya nan obliga di baha nan prijs drasticamente, pero tin momentonan cu esaki ta bira imposibel pa sigui carga y ta opta pa elimina cierto vuelonan. Den e cuadro aki e mandatario a comenta cu esaki ta e situacion den cual American Airlines, entre otro, ta pasando aden cu competencia fuerte specialmente for di mercado di New York(JFK). Lamentablemente mester bisa cu e decision a cay cu American Airlines no lo bula mas for di e destinacion aki pa varios destinacion den Caribe, entre nan, Aruba entrante 11 di november 2011, algo cu sigur lo tin su efectonan pa nos isla. E decision aki ta conta tambe pa Jamaica, St. Lucia, Republica Domincana, Barbados y Puerto Rico. Minister Otmar Oduber hunto cu e partnernan den e industria, manera ta AAA, AHATA, ATA y Departamento di Aviacion Civil, ta studiando e diferente posibilidad cu por tin pa busca un solucion rapido pa e reto den aviacion aki. Mientras tanto por bisa cu na e momentonan aki American Airlines tin un total di 16 vuelo pa luna y Jet Blue 54. Manera e titular di Turismo a informa recientemente, Jet Blue a bira den luna di april e aerolinea cu mas pasahero a transporta for di JFK pa prome biaha. For di e mesun destinacion aki Aruba ta conta tambe cu Delta cu tin un total di 5 vuelo pa luna, mientras cu for di New Wark nos ta conta cu vuelonan di Continental. E ta un noticia cu tabata di spera mirando e competencia grandi cu e low cost carriers ta representa pa aerolinea nan asina, pero nos ta haciendo nos maximo esfuerso pa por haya un solucion rapido pa e situacion aki. E ta un reto pa nos turismo sigur, pero mi tin e confianza cu e resultadonan positivo cu nos a bin ta conoce durante e prome 4 lunanan di aa lo continua. Ora november yega, nos ta spera di por tin ya caba un solucion definitivo pa e situacion di airlift for di New York, Minister Oduber a duna di conoce.