An Puno Han Acasia (Bro.

David Gamay Doncillo) May 21, 2011/ Cervantes Ilocos Sur Puno nga iguintanum ha amon guinikanan; Ira gud ini guinsaribuhan, guinataman, Tigaman han Kinabuhi, kalag han kalibutan; Naging tanod ug saksi han bug-os nga Kadaan. Iini nga puno akon na gud guinmat-an; Nagtatapo ha akon tikang ha kalangyawan, Pagsulod ha Bobon Ikaw huhuringan: "Maupay nga pag abot sa bungto nga Imo natawhan". Naglabay ini nga mga linog, bagyo ug magkusog nga uran, Waray gud ini kawawakay ug kapupukan; Kay siring pa niya Iya gud titindugan, Babantayan ini nga Bobon nga Iya guintudkan. An mgalangbo nga dahon san tamsi istaran; mga sanga niya guinhihimo nira nga salagan, Mag upay nga ugat an bungto guinpapanalipdan: Dagko nga mga baha Iya gud guintatanuran. Iini nga puno testigo san ngatanan, Diri la usa ka gatos an iya kinaadman; Hiya Buhi nga simbolo han Bobon nga Kadaan: Nagpapahinumdom, nagtitimangno sa bug-os nga katawhan. Pero Yana sin kalooy siya guinduhungan, Guin utod, guinpatay, guinpasipad-an: Bakaning man puno la, nga sin boses waray man, Waray manla kaimod an abid han luha dida ha katunaan. Mga bagyo, linog, ug magkusog nga uran; Iini nga mga butang waray gud ha iya pakapukan, Kay si Sr. Sto. Nino hiya binabantayan: Kay maaram an Diyos nga hiya yaman han kalibutan. Tawo nano kay guinpara mo? Nano kay imo ini nahimo? An Diyos guinsupak mo! An puno nga inataman guinpatay mo!!!