ATUR PENGAWA MELAH PINANG 2018

RUMAH STEPHEN, DABAI RASUK

4.30 LEMAI : - Nikika pengabang ( Beliang )

- Miring/manjap babi
- Ngewung pengabang
- Persembahan ngajat & joget ( Dabai Rasuk )
- Ai takar enggau ai sibur ( Udah pengabang duduk ba ruai )
- Ngelaluka pengabang ( TR. Stephen )

7.30 LEMAI : - Makai ( Sembiang )

- Jaku lalau/geliga ( Beliang )

8.30 MALAM : - Pengantin pansut

- Persembahan ngajat ( Engkalat )
- Jaku pengelalu ( TR. Stephen )
- Macha biodata pengantin ( TR. Stephen )
- Bejaku ke adat ( Mr. Nanggai )
- Jaku wakil ari pengantin indu
- Jaku wakil ari pengantin lelaki
- Jaku geliga/jaku lalau
- Melah kek
- Poco-poco ( Engkalat )
- Ngela ai ( Beliang )
- Pengantin nyadung ai
- Beambu isan
- Berami ( belagu/karaoke )

12.00 MALAM : - Ngirup kupi

5.00 PAGI : - Makai pagi

 Biodata Pengantin
Meri tabi basa sereta selamat lemai ngagai …………………………………………………..
………………………………………………………………………………………………………………………
………………………………………………………………………………………………………………………
………………………………………………………………………………………………………………………
………………………………………………………………………………………………………………………
Keterubah aku deka macha biodata pengantin indu. Nama iya, iya nya Sani
anak Kulin. Iya ada kena 19 haribulan enam 1985. Sani tu anak lumur dua sida
diri menyadi. Sani keterubah iya belajar ba SK Lichok, Roban belabuh ari
primari satu ngagai primari enam. Badu dia iya belajar ngagai sekula sekondari
SMK Kalaka Roban ari pom satu ngagai pom lima. Udah nya iya nampung
pelajar ngagai pom enam ba SMK BM Saratok. Dalam taun 2006 Sani bulih
training nyadi indu misi ba Kolej Sains Kesihatan Besekutu di Kuching. Tembu
training iya lalu belabuh gawa ba hospital besai Sarikei nyentuk ke diatu.
Dalam taun 2016 Sani lalu nambahka pelajar iya ba bidang indu misi ba Kolej
Sains Kesihatan Bersekutu, Sungai Buloh di Selangor ngambi Post Basik
Neonate. Nya munyi biodata pengantin indu.

Nyadi tu biodata pengantin lelaki. Nama pengantin lelaki tu iya nya Stener
Wesley anak Louis. Iya ada kena enam belas haribulan dua belas 1988. Iya tu
anak tuai sida menyadi. Nyadi Stener Wesley tu kerubah iya belajar ba SK Hua
Hin, Sungai Merah iya sebuah sekula Cina ba Sibu ari primari satu ngagai
primari enam. Udah nya iya nampung pelajar iya ngagai SMB Tiong Hin mega
sebuah sekula Cina ba Sungai Merah di Sibu. Nyadi iya tu landik bejaku Cina.
Enti deka meli barang tau mai iya ngambika ulih nawar rega. Stener Wesley tu
gawa ba Opis Kampung Sarawak tauka Sarawak Forestry di Sibu ti
bepengkalan ba Wisma Sanyan. Iya belabuh gawa dia dalam taun 2011.

Nyadi Sani seduai Stener Wesley tu keterubah iya betemu lalu bekelala ba
pasar Sarikei. Kepuas ke bejeling-jeling lebuh ke makai mee sereta ngirup kupi
dia seduai lalu ngembuan ati rindu ke pangan diri. Belabuh ari nya seduai iya
munyi ku sida nembiak kemaya hari tu lalu belabuh bemesej, bewatsap sereta
bewicit enggau pangan diri. Sepengelama lima taun seduai iya madu
pengerindu, dia seduai lalu bisi runding deka ngatur diri begulai sejalai seati
sekunsi niri ke rumah tangga. Ari nya Stener Wesley lalu mai bala sida ari
Engkalat Sibu nya nanya endu Sani lalu seduai iya ditunangka ba rumah
Stephen tu kena 12 Mei 2017. Nya alai, seharitu sida mengua karung beridi,
sida ti datai ari gelenggang Engkala lelanji deka nyidi abi kaki ke ditujah sida
setaun ti udah lepa. Malam tu bala kitai ke betunga duduk besila mua
pemayuh-mayuh baka beluh lugan kerapa, beanak-anak baka lemetak tinting
Lingga. Deka bebandaka bunga kenangi ke seruran meali-ali ngabaka bunga
bau renggut.
 ADAT MELAKI BEBINI
Meri tabi basa sereta meri selamat lemai……………………………………………………….
………………………………………………………………………………………………………………………
………………………………………………………………………………………………………………………
Lemai tu aku deka bejakuka adat igat Stener Wesley anak Louis enggau
endu Sani anak Kulin. Nyadi adat seduai iya munyi ke udah dikerandauka bala
kami iya nya tiga jabir tauka tiga mungkur. Ba mata duit iya nya RM 3.00. Nyadi
adat tauka mata duit tu ila lebuh kita pulai ke Engkalat, dibagi kita din laban
tu dikena kita nerangka seduai ke udah jadi melaki bini. Awakka bala kita
sekaban din lebuh ke bisi meda seduai iya begulai duduk berimbai bepegai jari
besendi kaki enda ngumbai anak anak indu kami tu indu simpan indu taban
tang udah sah dipejaku sereta diditikah kitai nyadi bini Stener Wesley.
Nyadi laban Sani tu bisi aka ke bedau bisi sanding bisi kaling tauka bedau
bisi orang enggau begulai. Reti iya Sani tau dikumbai kitai ngelangkah. Nya alai
aka iya Probino Indun minta adat 3 jabir tauka mungkur tiga. Enti pulai ke mata
duit nya RM 3.00. Tuju iya, ngambika seduai iya chelap lindap, gerai nyamai,
lantang senang, bulih reta bulih tengkira, gayu guru nguan menua.
Lalu ke penudi tu iya nya cengkeram seduai ke jadi melaki bebini.
Nyadi adat tu digaga tauka diatur ukai ketegal kitai rindu sereta ke seduai
tebelerai enda begulai tang dikena kitai nanggam seduai begulai sejalai sampai
ke tuai tauka sampai diserara ke petara. Cengkeram seduai ke jadi melaki bini
tu iya nya RM 500 ringgit. Nyadi sapa-sapa bagi seduai ke dulu mungkar dulu
nanjal, dulu munggah dulu ngayah ke pangan diri deka kena adat tu. Ngambika
kita mayuh sama bela nemu baka ke lemai tu kelimpah ari adat tu seduai mega
tau bai ngagai court laban seduai iya udah besumpah ba court deka begulai
enggau pangan diri sampai ke jemah ila. Nyadi pekara nya pulai ngagai court
mih.
Nya aja terima kasih.
Jaku pengelalu ari wakil pengantin indu

Meri tabi basa sereta selamat lemai ngagai ………………………………………………….

………………………………………………………………………………………………………………………
………………………………………………………………………………………………………………………
………………………………………………………………………………………………………………………
………………………………………………………………………………………………………………………
Keterubah iya aku meri selamat datai kelebih agi ngagai bala ti datai ari menua
Engkalat Batang Igan Sibu. Meri terima kasih mega ngagai bala kita ke ulih
datai ulih sangkai ba ruai ba tikai ba ruang ba panggang kami di Dabai Rasuk
ditu. Ba awak tu mega aku ninggalka jaku aku ngagai bala isan aku di Engkalat
di Engkalat din nyangka lebuh anak aku bisi nemuai ngagai kita di Engkalat din
iya bisi enda nemu masa enda ngekelala bala kaban aya bala ibu, aki-ini sereta
bala ipar dedin tauka lebuh iya ke nemuai kin enda nemu ngintu emparu ruang
bilik.Enda nemu berapi bebela minta kita anang guai ngusai, anang guai enda
nyamai. Ajar mih iya ulih kita din. Munyi ku jaku tuai, enti nya tak pelanduk
tauka jelu mit intu kita din dulu mih. Tang enti nya tak rusa, kijang ka pan enda
enggau mih kami ditu emparu. Nyadi ngena awak tu kami sebilik minta ampun
ngagai bala ari Engkalat enggau semua bala pengabang ti bisi datai ngulu
pengerami nikah anak aku baka ke lemai tu nyangka sambut, basa enggau utai
ti dibantai ke kami bisi kurang, enda ngemuas sereta enda ngemantupka ati
kita. Dikena aku ngujungka jaku aku, aku meri terima kasih ngagai semua bala
kaban belayan ke bisi datai nyukung nulung mantu aku ngereja pengawa tauka
duit ringgit aku meri terima kasih besai ngagai kita semua. Pia mega enda
ditinggal ke ngagai bala kami serumah ke sama bela udah kiruh nulung kami
sebilik ngereja pengawa melah pinang anak aku tu. Pia mega enda ditinggl ke
aku ngagai bala tukang masak kitai di dapur din ke udah kiruh ngintu pemakai
kitai. Nyadi sukung tulung kita nya enda ulih aku balas tang arap ke Allah Taala
berekat ke kita semua lantang senang nguan menua. Nya aja terima kasih.

‘
Pengantin pansut lalu di malinka muzik pengantin lalu disambung lagu selamat melah pinang.
Diatu kitai deka diperindang enggau pengawa ngajat wakil sida ari Engkalat nyin.
Nya kitai udah meda lingut sereta kuit sida ke indu ari Engkalat. Nyau telengga lilih sida ke
bujang abis enda tetelanka ai liur. Anang memacham kita, kada enda bisi orang empu nya.
Sayau enda serambau. Anang ringat au, jaku tundi nya.

1. Uji anang guai inggar dulu kitai mayuh, kitai banyak. Baik tuai, baik biak, baik ke punas tauka
bisi anak. Uji ngetu dulu kita bejaku diau jenuh anang ragak laban kita deka belabuh pengawa
melah pinang baka ke lemai tu. Munyi ku jaku tuai deka begulaika peratai bungai beta, deka
nyemakaka lunda minyak lala, deka besuluka resu garu baga.

Keterubah iya meri tabi basa ngagai bala ________________________________________

___________________________________________________________________________
___________________________________________________________________________
___________________________________________________________________________
___________________________________________________________________________
___________________________________________________________________________
Indu lelaki, mit besai, tuai biak ke bisi sampal datai begelumu ba rumah Stephen, Dabai Rasuk
baka ke lemai tu.

Nyadi keterubah iya baka lemai tu aku nganggau ke tuai rumah Stephen iya tuai rumah sida
di Dabai Rasuk ditu ngelaluka bala pengabang, bala temuai ke bisi datai baka ke lemai tu.
Enggau basa ti besai aku ngangkatka tuai Stephen ………………………………………………………………..

Nya munyi ku jaku pengelalu ari tuai rumah Stephen. Terima kasih tuai rumah.

2. Dikena kitai neruska program kitai baka ke lemai tu aku nganggauka Mr. Nanggai bejaku
lalu nerangka adat seduai ke jadi melaki bini baka ke malam tu. Enggau basa ti besai aku
ngangkatka Mr. Nanggai.

Nya tadi kitai udah ninga adat seduai ke nikah baka ke malam tu. Arapka semua kitai udah
sampal ninga lalu nusui nampung pekara nya sekalika ba menua kitai di batang Sebelak tu
tauka ba menua Engkalat di batang Igan, Sibu din.

3. Nangkanka diatu aku sekali agi nganggauka tuai rumah Stephen macha biodata pengantin
indu enggau pengantin lelaki. Enggau basa ti besai aku ngangkatka tuai rumah Stephen.

Nya munyi ku biodata pengantin ti udah dibacha tuai rumah. Sekali agi meri terima kasih
ngagai nuan tuai rumah. Nyadi diatu enda baka kelia ngiga orang indu bakih. Enti rambau
kami suba lelak beanti ke pangan diri deka betemu. Diatu ne chulit-chulit ke orang aja ba
telepon enggau gegambar pansut. Nya tanya kita tuai rumah ari Engkalat nya enti ngumbai
bula.
4. Diatu kitai deka nganggauka wakil ari pengantin indu enggau lelaki meri seleka dua jaku
ngagai kitai mayuh enggau ngagai seduai ke nikah iya nya endu Sani enggau igat Stener
Wesley. Keterubah tu aku nganggauka Mr. Kulin iya nya apai indu datai kitu. Enggau basa ti
besai aku nganggau ke Mr. Kulin