Caé Subki Paték.

Meubalek Arah
Assalamu ‘alaikum kaóm meutuah
Bangsa nyang meugah ban sigóm donya
Acéh lhéé sagóe naggróe keuneubah
Beudóh tapapah bék lé lam dawa

Ngón kruseumangat rahmat meulimpah

Ngón tulóng Allah Acéh ka jaya
Sabóh uróe teuka seujarah riwayat peugah meuneumat bangsa
Peneutóh nyang jroh ta satóh beupah

Bek sagai salah takót meutuka

Meuseu meutuka meubalek arah
Saidil angkasah yang that mulia
Yang sahbat nabi bukti meutuwah

Dalam seujarah além ulama

Watéé rab wafeut di Rasulullah
Laju neupeugah bak sahbat dumna
Nibak híe adat sahbat meutuwah

Panggilan Allah lon katroh teuka

Menyóe na désya atawa salah
Cuba tapeugah laju beusigra
Jinóe keuh masa jeut tatúng balah

Nyang hana meuah buét lon seungaja

Seuót lé sigra saidil angkasah
Ya Rasulullah bak lon meudésya
Masa lam seuh prang lon keunong neupoh bak rúeng keumóng ngon samsiguda

Nyang keuh nyan salah ya Rasulullah

Hajat lon balah ngon jaróe hamba
Dum sahbat laén ngeurén amarah
Karna angkasah keuneuk túeng balah

Dum brié pendapat siasat titah

Wahé angkasah bahlé tatuka
Lon théun geulantóe jinóe tabalah
Bék Rasulullah tapóh lé gata

Karna pang uléé kalajé ulah

Neuwóe bak Allah karab tróek masa
Seuót lé sigra saidil angkasah
Lon laké meu’ah wahé syédara

Nyóe urusan lon ngon Rasulullah

Lon neuk túeng balah ngon jaróe hamba
Seuót Muhammad mangat sileupah
Meuhéut angkasah neu yúe laksana
Nyópat samsi lon ampon angkasah
Cuba túeng balah bek lé meudawa
Ka neu jok samsi saidil angkasah
Ya Rasulullah gólom sempurna

Masa lon neupoh ya Rasulullah

Sampé róe darah bajé hana
Nabi sut bajé teunté lé bagah
Saidil angkasah neukalon nyata

Kulét Muhammad jróh that meuleumpah

Putéh ngon mirah ban bungóng jeumpa
Ka neubóh samsi saidil angkasah
Bak Rasulullah neu rungkhóm neuwa

Neucóm bak dada sigra lé bagah

Di Rasulullah laju meusabda
Jróh meulimpah gata angkasah
Meutuwah sahbat nyang seutia

Haréum di pajóh tubóh angkasah

Haréum di jamah apui nuraka
Yang cóm tubóh lon ampón bak Allah
Gata lon peusah asóe syuruga

Dum sahbat laén ka teuhah babah

Tajóe meuleumpah jak cóm maulana
Yóuh awai beungéh saidil angkasah
Jinóe kateulah seubab meuguna

Beungéh dum rakyat keu pak peujabat

Karna yang diharab neupeutrók hana
Awai meujanji ka deungón rakyat
Peu yang neuharap meupeutrók sigra

Oh leuh ta peu ék bak lapék itam

Akhirul kalam geuli’nyúng lam bintéh
Sóe yang meusumpah nibak uróe nyan
Neucok lé rijang apui nuraka

Meumada oh nó ca’é lon karang

Peumeu’ah rijang nyang meurasa
Maklum di ulon peugót karangan
Ka jula malam ka teungéut mata

Hantóm biasa peugót karangan

Di ulon tuan wahé syédara
Dengón wassalam kasép keuh ét nó
Minggu ukeu nyoe laén lon rika

Wassalam : Subki Paték Aceh Jaya