PARLAMENTO NACIONAL

Secretariado da Bancada Parlamentar de FRETILIN

DEKLARASAUN BANKADA FRETILIN

IHA
SESAUN SOLENE ABERTURA
SESAUN LEJISLATIVA DAHULUK BA V LEJISLATURA

Husi prezidenti bankada, Dr. Aniceto Longuinhos Guterres

Sua Exelénsia Prezidente da Repúblika, Dr. Francisco Guterres Lu-Olo

Sua Exelénsia Prezidente Parlamentu Nasional, Sr. Arão Noé
Colegas Deputadus,
Povu Maubere no Buibere tomak,

Dadeer ida ne’e, Uma Fukun ida ne’e hetan onra boot ida simu ita hotu nia
Na’i Prezidente da Repúblika, Sua Exelénsia Dr. Francisco Guterres Lu-
Olo. Prezensa ida ne’e ita selebra iha okaziaun ida importante tebetebes
iha ita-nia konjuntura polítika.

Prezensa ida ne’e atu asinala inísiu ba sesaun lejizlativa foun, iha momentu
ne’ebé nasaun tomak hein hela desizaun importante oioin husi sira nia
reprezentante sira iha Uma Fukun ida ne’e, no mós husi lideransa nasionál
tomak.

Husi ne’e ba oin, ita sei foti desizaun importante oioin, ne’ebé bele, no
tenke asegura ita nia futuru, atu kontinua iha trajetória ida ba
dezenvolvimentu sustentável, hodi garante futuru ida di’ak liu tan ba ita-nia
oan ho bein oan sira, iha aspetu sosiál ho ekonómiku.

Nune’e, FRETILIN firme iha ninia konviksaun katak xave atu alkansa buat
sira ne’e mak boa governasaun, ne’ebé sei metin liu tan ho kontrolu ho
balansu ida efikás entre órgaun de soberania hotu-hotu.

Iha sesaun lejizlativa ida ne’e, nudár Reprezentante Povu nian iha Uma
Fukun ida ne’e, FRETILIN sei kontinua ninia esforsu tomak atu asegura lei
no prosesu hotu-hotu ne’ebé bele garante boa governasaun.

fb.me/FRETILINPN Pájina 1 husi 3

 PARLAMENTO NACIONAL
Secretariado da Bancada Parlamentar de FRETILIN

Boa governasaun presiza lei anti-korrupsaun ida forte no efetiva. Ita presiza
aprova lei anti-korrupsaun ida ne’e efetiva atu evita ezbanjamentu ba
Estadu nia rekursus finanseiru hotu-hotu no hanetin koezaun sosiál.
FRETILIN hahú ona prosesu atu hahú diskusaun no aprovasaun ba lei ida
ne’e. Ami iha esperansa katak deputadu hotu-hotu iha Uma Fukun ida ne’e
partilha urjénsia hanesan ho ami atu aprova lalais lei ida ne’e, e sira sei
servisu hamutuk atu finaliza lei ida ne’e.

FRETILIN hakarak órgaun fiskalizadora ida ne’e hametin liu tan sira nia
knaar ho rigor atu fiskaliza implementasaun ba programa governu nian, tuir
duni lei no serve duni Povu no Estadu nia interese. Povu ho Estadu merese
polítika ida ho kualidade. Ita presiza investe maka’as iha kualidade, e
Bankada FRETILIN sei tau matan maka’as ba órgaun ezekutivu iha
implementasaun ba sira nia programa.

Pasu ida atu alkansa tarefa ida ne’e mak liu husi inkéritu parlamentár
ne’ebé FRETILIN ho ninia aliadu inisia ona. Rekerimentu ida ne’e ezije
Parlamento atu estabelese Komisaun Inkéritu ida atu revé fali prosesu balu
ne’ebé rezulta iha ajudikasaun direta ba projetu atus ida haatnulu resin,
ne’ebé governu halo loron lima antes eleisaun lejizlativa iha fulan Julho
tinan 2017. Inkéritu ida ne’e sei ajuda Estadu atu revé filafali, no hadi’a ita
nia prosesu aprovizionamentu, atu hametin sistema ida transparente no
justu liu tan.

Hamutuk ho Inkéritu Parlamentár ida ne’e, Bankada FRETILIN mós sei

kontinua ninia apoiu ba auditoria ba instituisaun Estadu hotu-hotu, inklui iha
ZEESM, polítika ne’ebé VII Governu Konstitusionál hahú, e ami espera
katak VIII Governu Konstitusionál sei kontinua.

Maibé FRETILIN mós preokupa maka’as ho kestaun dívida Estadu nian. Ita
presiza hakotu prátika dívida tomak, ne’ebé deskontroladu. FRETILIN sei
kontinua tau matan ba ida ne’e.

Sr. Prezidente da Repúblika,

Distintu Deputadu sira hotu,

fb.me/FRETILINPN Pájina 2 husi 3

 PARLAMENTO NACIONAL
Secretariado da Bancada Parlamentar de FRETILIN

Iha fulan Maiu tinan ida ne’e Na’i Prezidente deside konvoka eleisaun
antesipada ida tanba ita polítiku sira la konsege halo diálogu atu hetan
solusaun ba ita-nia direfensa. Eleisaun ne’e liu ona, agora tempu atu ita
hotu fó liman ba malu atu servisu ba ita nia Povu, ba ita-nia Nasaun.

Maibé atu implementa ita nia objetivu, planu ho programa sira ne’e, ita
presiza ambiente ida kondusivu ba diálogu, ba kooperasaun, ba
kolaborasaun husi forsa hotu-hotu iha ita-nia sosiedade, liuliu husu
Reprezentante Povu nian iha Uma Fukun ida ne’e.

Ambiente ne’ebé nakonu ho deskonfiansa, ódiu ho vingansa, sei la loke

espasu ba ita atu servisu hamutuk. Persegisaun husi grupu ida kontra
grupu seluk sei taka dalan ba diálogu atu rezolve ita-nia diferensa.

Kolega Deputadu sira hotu,

Demokrasia ezije diálogu. Kampaña ba eleisaun ramata loron tolu antes ita
bá vota. Povu ba vota ona hodi hili sira nia reprezentante sira, ne’ebé sei
tuur hamutuk atu servisu ba sira nia interese. Ita hotu-hotu iha Uma Fukun
ida ne’e reprezenta Povu ida de’it, e Povu tomak merese atu governante
sira rona sira nia lian, sira nia aspirasaun. Demokrasia sei la materializa
enkuantu Laiha diálogu.

Bancada FRETILIN lakohi iha inimigu. Ami iha adversáriu ne’ebé potente,
lideradu husi figura istória na’in rua, komanda maioria asentu iha
Parlamentu Nasionál. Ami rekoñese dezafiu ida ne’e. Maibé ami la haree
ba ami nia adversáriu hanesan dezafiu de’it, maibé haree mós ba sira
hanesan oportunidade atu servisu hamutuk hodi avansa interese Povu no
Estadu nian tuir FRETILIN nia misaun no vizaun ba futuru.

Ikus liu, FRETILIN hakarak hato’o katak nia kontinua depozita ninia
konfiansa no apoiu tomak ba Na’i Prezidente da Repúblika iha ninia knaar!

Obrigadu!

fb.me/FRETILINPN Pájina 3 husi 3