RABELADU SANTIAGU

By Dr. Azágua
N nase n’un nôti txuba!
N ka batizadu ku águ
N ka rajistadu ku kanéta
N ka fazêdu nôti-séti.

Má-n dadu nomi!

Txoma-m nha nomi
N ta kudi-u.
Nha nomi é Rabeladu
Rabeladu Fidju Santiagu.
Rê di Spinhu Branku
Korason di Kalheta!

Déus nega-m
NhôrDés toma-m!

Ave Maria
Lua xêa di grasa.
Mi tanbê é fidju Déus!

Nha korason
Ta bati tanbe!
N t’odja ku ôdju
N ta pega ku mon.

Déus da-m boka

Pa-n flâ dôs kusa;
El da-m djuís
Pa-n julga mundu.

Mi é un pasu ku aza
Ki t’anda ku pé na txon.
N ka prufesor di stória antigu
Nen mudérnu.
Má kada padás di txon
di Spinhu Branku
É sagradu!

Si bu kumida é konflitu
 É ka ku-mi!
Na nha mésa
Ka ten faka
Ka ten garfu!

Mi é karismátiku
konfianti
animadu
Y n ka ten konta!

Déus nega-m
NhôrDés toma-m!

É mi k’é Rê di Spinhu Branku

Sínbulu Rabeladu !
Enbóra tudu spinhu é krabu
Tudu mansu é brabu
Tudu diabu é bujon
Tudu santu é satanás
Palavra pruibidu é pás!

Kred’in krus...
Bérbunkadu Fatusés!
Nhos ka Musés!
Bérbunkadu Satanás
Nhos dexa-nu en pás!

Li na txon di Spinhu Branku

Tudu spinhu é krabu
Tudu diabu é santu!

Li na txon di Spinhu Branku

Ka ten pulêru
Ka ten madjon!

Li na txon di Spinhu Branku

Sol ta nase tudu dia
Sukuru ta fitxa tudu noti!