Ufú!...

Dês bês gó k’ê bês!

By Dr. Azágua

Padri Kintinu

Kumesa ku sê inu,

N’altar

Ku rostu xei di ar;

Kantadu na purtugês

D’un bês;

Enbora sen fregês,

El tenta da genti kunfiansa

Y speransa.

Meus irmãos,

Queridos irmãos...

Levantem!...

Levantem todos e cantem!

Com os olhos postos em Jerusalém...

Libertai-vos do mal

E do pecado mortal!

Komu subida staba íngri

el kumesa ta korre sima tígri;

Dentu kel, el troka mudansa

Pa da gentis más kunfiansa

Y speransa:

Meus irmãus,

Nha tud’irmãus...

Nhos ka pagãu nãu!

Nãu, Nãu!

Y nãu!

Isu nãu!

Nhos tudu ê kristãu!

Nhos dixa di prigisa

Nhos ben misa

N ta da nhos tudu arbisa!

Irmãus na fé,

Nhos pode pô fé...

Li n’es kaza

Nhos tudu ten aza!

Nen na rua nen n’igreja

Nho ka pode ten inveja!

Nen maldadi

Nen vaidadi!

Nhos vive nhos mosidadi

 Ku tudu sinplisidadi!

Nhos ta bua pa séu

Ku véu,

Sen véu,

Ó ku txapéu!

Muzés sai la di kantu

Invokadu pa santu,

Anju

y Arkanju:

Abaixu anarkia!

Viva dimokrasia!

Viva ierarkia!

Viva nho padri,

Viva nho bispu,

Viva nho kardeal

Viva nho Santu Papa!

Palmas! Palmas!

Nhos da más palmas!

Palmas dimora dés minutu...

Pamó misa stá sima kaza di lutu...

Palmas éra tãu riju

Kel mata tudu moska dentu greja...

Ki kal kumesa ta baza di paredi...

Fumu tranka dentu greja

Sima núbri na tenpu d’azágua...

Dentu kel, Kapitãu Rosa dispara:

Nhos para! Nhos para!

Asin nãu!

Please! Please!

Good enough!

Dja sta bon!

Dja txiga!

Padri Kintinu gradise genti

Es fika tudu kontenti;

Pontêru ba pa frenti

Kabu fika más kenti;

Txiga óra di kumunhãu,

Óra di uniãu;

Símbulu di pãu y vinhu

Pa tumadu ku tudu karinhu

Divagarinhu y mansinhu.

Pa konfesadu pekadu

Pa ka fikadu maldisuadu;
 Mumentu munumentu!

Labanta vos, Prínspi di Ximentu;

Diskursu! Diskursu!

Má só pa ken ti ten kursu!

Que pressa!

Ora essa!

Agora é o que faltava

Pra quem nunca mandava!

Nhos ba ta rima...

Ken ka po na bixa

Ta fika ta lixa;

Li n’es txon di pedragás

Ka konxedu pás...

Li ê ken ki pode más!

Diskursu! Diskursu!

Má só pa ken ti ten kursu!

Mi ê pedrêru!

Mi é karpintêru!

Mi ê sapatêru!

Mi ê ferrêru!...

Kudi un grupu la trás

 Djuntu sés kapatás

Tud’animadu

Y rimadu

Sen palavra sinkopadu.

Kudi um môs la di Mustêru:

N ka injinhêru

Má mi ê prátiku

Y mutu sinpátiku;

N t’odja mundu na dés dimensãu

Sen ninhun pretensãu;

Sen lenga-lenga

Sima Juzé di Denga.

Nhos aguenta...

Nhos aguenta...

Nu sta li ta tenta;

Má primêru,

Nu ta kumesa di pulêru;

Dispos nu ta pasa pa gudjêru...

Gudjêru?

Nu parse gentis di gudjêru?!

Nos ê di Mustêru

Ki ben stranjêru
 Ka só pamó dinhêru;

Nos ê konxêdu pa mund’intêru!

Kudi un vos di ladu:

Konxêdu pa mund’intêru?

Bo ê própi brajêru!

Dixa d’izajeru!

Ken ki fra?!

El kudi

Ku mon ta sakudi:

Mi ki fra!

Mi li própi ki fra!

Mumentu Kodak...

Ku rilóji ta tiki-táki!

Take five...

Ufú!

Xa-m fra-bu...

Xa-m torna fra-bu...

Dês bês gó k’ê bês!