LIA MURAK LORON OHIN

ESPERANSA KIAK SIRA NIAN IHA RIKU SIRA LE’ET

Esperansa mak confiança ema nian atu alcança desejo nebé ema iha. Esperansa kiak sira nian
mak ksolok, maibé, ksolok nebé sira deseja susar atu atinge. Nune’e ita husu, Qual é o problema?
Problema iha compaixão ema riku sira nian. Ita husu tan, Se mak kiak / Se mak riku?

Iha contexto Timor Lorosa’e; Kiak mak ema sira nebé laiha sasan naton atu responde ba
necessidade primária no secundária sira, sa tan desejo extraordinário sira. Laos deit kiak iha
sasan maibé kiak mos iha capacidade intelectual no seluk-seluk tan, nune’e, halo ema ne’e laiha
capacidade atu supera hosi kiak, mout iha nakukun no lakon esperansa. Iha sorin seluk, existe
iha kiak sira le’et, Riku sira nebé iha sasan barak to’o naresin, iha capacidade no forsa atu halo
buat barak iha moris.

Iha realidade moris, ema hotu-hotu hakarak sai riku, maske barak la consegue. Wainhira sai riku;
rikusoin halasu ema sai foti an, delek ba ema seluk nia sofrimento. Kiak hatodan halo ema
desespero, lakon esperansa moris iha mundo. Iha lika liku moris ida nune’e, kiak sira laran metin
ba riku sira. Riku sira hetok delek liu-tan, haluhan tiha katak rikusoin sei nabeen, sei hela mak
hahalok di’ak. Hahalok diak nebé fó ksolok ba kiak sira no fó ksolok mos ba sira an, mak
hahalok compaixão nian.

Compaixão mak qualidade interior ema nian, be lori ema atu senti no respeito sentimento maluk
seluk nian. Iha nebá haksumik virtude tolu mak: Sinseridade; la hatene bosok. Sacrifício; fó no
la hein atu simu recompensa, to’o, pronto hamate an hodi hamoris ema seluk. Tolerância;
respeita diferênças, la halo discriminação ba ema, trata ema seluk hanesan an rasik. Virtude hirak
ne’e mak bo’ok nafatin ema nia fuan, hodi, tama iha maluk seluk nia realidade, senti sira nia
sofrimento no esforço atu ajuda. Compaixão nebé to’o deit iha hetene ema nia situação, ne’e
mamuk, maibé tenki nakfilak sai ação, katak iha desejo atu hakmaan sofrimento maluk seluk
nian.

Compaixão ida nune’e, mak tenki haburas iha ema riku sira fuan, halekar iha sira hahalok hodi fó
esperansa no ksolok ba kiak sira, katak sira la moris mesak, iha sira le’et, existe ema riku wain
be disponível tulun sira, laos deit iha sasan maibé liu-liu, encoraja sira atu keta lakon esperansa
iha tempo desespero nian. Tau nafatin esperansa iha an rasik , iha maluk seluk be haleu no liu-liu
nuudar cristão tau nafatin esperansa nia Maromak, basá sira nebé tau esperansa iha Maromak sei
moris nafatin iha ksolok (Cfr. Salmo 146, 5) no wainhira tau esperansa iha Maromak, keta laran
tarido basá terus iha rai maibé sei hetan ksolok iha lalehan (Cfr. Lc 16, 25).